Segundo os datos publicados polo INE, e recollidos pola Axencia EFE, a compravenda de vivendas caeu un 22,9% en Galicia no mes de novembro, o que corresponde a un descenso 7,8 puntos maior á media de España, encadeando dez meses consecutivos de descensos. A pesar disto, crece un 2,1% con respecto ao mes anterior. Das 46.888 operacións rexistradas en España, 1.538 foron en Galicia, acumulando un descenso de 9,3% no ano, tralas sucesivas subidas que experimentaron os tipos de interese e o consecuente encarecemento que provocaron no financiamento hipotecario. Das operacións de compravenda anotadas en novembro en Galicia, 1.484 realizáronse sobre vivendas libres e 54 son de protección oficial. Así mesmo, 375 son vivendas novas e 1.163, usadas.

En novembro realizáronse un total de 2.968 operacións sobre vivendas, sendo 1.538 compravendas, 803 herencias, 30 donacións, 14 permutas e 583 operacións de outro tipo. O total de fincas transmitidas en Galicia ascendeu a 9.503 en novembro, das cales 5.594 eran urbanas, 2.968 vivendas, 433 solares e 2.193 de outro tipo, e 3.909 rústicas. 

Fonte.- EuropaPress