O Concello de Pontevedra iniciou unha nova fase de actuacións nas súas dúas ARIs (Área de Rehabilitación Integral de Vivendas). Estes son o de Estribela, que acada adécima fase dende a súa creación no 2007, e o do centro histórico, declarado como zona de actuación en 2012 e que chega á súa quinta etapa de axudas e subvencións. Pero, aínda non se abriu o prazo para presentar os proxectos e solicitar as subvencións.

O goberno local asinou hai uns días conxuntamente con outros municipios galegos, o convenio co Goberno central e a Xunta, que establece a mobilización de preto de dous millóns de euros, entre investimentos públicos e privados. Deses fondos, 1,6 millóns resérvanse para actuar en 80 vivendas: 55 delas no centro histórico, cun orzamento previsto de 1,6 millóns, e outras 25 en Estribela que conta con 120.000 euros.

Do orzamento total, a Xunta aporta uns 132.000 euros e o Goberno central destina algo máis de 560.000 euros, aínda que neses fondos inclúense tamén as denominadas "obras de reurbanización", co fin de mellorar o espazo público, especialmente rúas ou prazas. En Estribela destínanse para este fin 32.00 euros e hai 240.000 máis para o centro histórico, onde se actuará no lateral da Casa Consistorial e en Pasantería.

Deste xeito, os propietarios das vivendas que optan ás subvencións cubren polo menos a metade dos gastos, e poden optar a axudas que oscilan, de media, entre os 2.700 e os 11.400 euros, en función das actuacións que leven a cabo, que poden ir dende unha rehabilitación integral a simples melloras de accesibilidade ou de eficiencia enerxética.

Fonte | Faro de Vigo