A Organización para a Cooperación e o Desenvolvemento Económico (OCDE) advertiu a España de que limitar os prezos do alugueiro pode ter efectos negativos cara aos inquilinos.

O estudo presentado polo organismo ten como obxectivo favorecer a vivenda alcanzable e así sinala que a redución dos alugueiros acaba reducindo a oferta de vivendas e por iso, moitos futuros inquilinos ven minguadas as súas posibilidades de atopar casas de alugueiro.

A OCDE sinala que o problema nos últimos anos coa vivenda foi que os prezos dos alugueiros creceron con forza. A dificultade do acceso á vivenda en España acentúase para as persoas con baixos recursos. Entre o 20% do grupo con menor ingresos do país, un 46% ten que dedicar como mínimo, o 40% do seu salario á vivenda. A media dos países da OCDE é un 35,2%.

Como solución, o director de estudos do departamento económico da OCDE propón outras opcións que non crean os mesmos tipos de custos, como o desenvolvemento de vivendas sociais.

Fonte | El Español