Heriberto García explica que estes inmobles pasarán a ser cualificados como de promoción pública e serán destinados a alugueiro social a prezos accesibles

Os actuais inquilinos son, na súa maior parte, familias afectadas por desafiuzamentos ou en situación de vulnerabilidade e tras a adquisición poderán seguir residindo nestas vivendas nas mesmas condicións que ata o de agora

A Xunta reforza o parque público residencial destinado a alugueiro coa compra de 55 vivendas a Abanca nunha trintena de concellos por 3,9 millóns de euros.

Logo de asinar as escrituras de compravenda coa entidade bancaria, o director xeral do Instituto Galego da Vivenda e Solo (IGVS), Heriberto García, sinalou que todas estas vivendas pasarán a ser cualificadas como de promoción pública e serán destinadas a alugueiro social a prezos accesibles.

Segundo precisou Heriberto García, o IGVS xa xestionaba na actualidade estes 55 inmobles en virtude dun convenio de colaboración subscrito coa entidade financeira no ano 2019 para garantir que persoas e familias afectadas por execucións hipotecarias puidesen manter as súas vivendas habituais, e que colectivos desfavorecidos ou en situación de exclusión social tivesen acceso a un contrato de alugueiro social a prezos reducidos.

Por iso, unha vez propiedade da Xunta, os inquilinos que ocupan actualmente estes inmobles e que na súa maior parte se corresponden con persoas en situación de vulnerabilidade, poderán seguir vivindo nelas nas mesmas condicións que ata o de agora, incluído o importe que pagan en concepto de alugueiro, que oscila entre os 41 euros e os 125 euros mensuais (unha media de 79 euros).

De feito, o director xeral do IGVS incidiu en que un dos obxectivos de promover desta operación é facilitar a permanencia nos seus fogares de persoas vulnerables ou que se visen afectadas por un desafiuzamento ou unha execución hipotecaria no seu día e que, por conseguinte, necesitan un alugueiro social.

Así mesmo, a Xunta tamén avanza no seu obxectivo de incrementar o actual parque público residencial baixo a súa titularidade, reforzando a oferta naqueles municipios onde segue existindo demanda de vivendas protexidas en réxime de alugueiro.

A continuación detállanse os municipios e as vivendas propiedade de Abanca que vén de adquirir o IGVS.

CONCELLO	NÚMERO DE VIVENDAS
A Coruña	4
A Laracha	1
Cee	1
Miño	1
Narón	1
Negreira	1
Porto do Son	1
Ribeira	2
Monterroso	1
Rábade	1
Sarria	1
Ourense	3
Verín	1
Vilar de Santos	1
A Cañiza	3
A Guarda	2
Caldas de Reis	2
Cangas	1
Lalín	1
Marín	1
Moaña	1
Mondariz	1
Nigrán	1
Ponteareas	1
Pontecesures	2
Pontevedra	1
Salceda de Caselas	1
Salvaterra de Miño	4
Silleda	2
Tomiño	2
Vigo	8
Vilanova de Arousa	1
TOTAL	55

Fonte.- Xunta