O Instituto Nacional de Estadística (INE) e o Colexio de Rexistradores publicaron sendas estatísticas sobre o sector inmobiliario. Así, o primeiro presentou o Índice de Prezos de Vivenda (IPV) do terceiro trimestre do ano. En Galicia aumentou un 1,9%, co que acumula xa 24 trimestres (seis anos) de crecementos interanuais. Porén, as últimas subas ralentizáronse.

Os rexistradores fixeron pública a súa estatística rexistral inmobiliaria correspondente ao mes de outubro, segundo a cal as compravendas de vivendas inscritas no Rexistro da Propiedade na comunidade galega cairon un 1,6%. Polo tanto, ambas estatísticas mostran que os prezos aguantan os efectos da pandemia, aínda que as compravendas aínda se resinten.

O prezo da vivenda subiu en Galicia un 1,9% no terceiro trimestre deste ano en relación ao mesmo período do exercicio anterior, máis que a media estatal (+1,7%). A porcentaxe é de oito décimas inferior ao do trimestre anterior e o menor dende setembro de 2017. É dicir, aumentan os prezos das vivendas, pero cada vez o fan a menor ritmo.

Pese a todo hai diferenzas entre a vivenda nova e a usada. A primeira subiu de forma interanual un 10% en Galicia, por encima da media nacional (7,5%); mentres que a de segunda man elevouse un 0,9%, tamén máis que o incremento nacional do 0,8%, segundo o Índice de Prezos de Vivenda do Instituto Nacional de Estatística

Fonte | La Opinión Coruña