Os prezos dos alugueiros seguen disparados en Galicia e en moitas cidades segue sendo complicado atopar vivenda, como no caso de Compostela. Porén, o portal inmobiliario Idealista detectou unha baixada dos alugueiros no mes de agosto, partindo dunha análise dos prezos nas capitais de provincia. Así, segundo este estudo, o prezo dos alugueiros baixou o pasado mes 1,3% en Galicia, o segundo maior descenso de España a respecto do mes de xullo, só superado polas Illas Baleares, onde a caída chegou a 1,5%. 

No seu informe, o portal inmobiliario Idealista sitúa a cidade da Coruña entre as urbes onde máis se moderaron os prezos dos alugueiros. Cunha redución de 2,6% ocupa o terceiro lugar, só superada por Teruel (2,9%) e Sevilla (2,8%).

Os datos de Idealista refírense só a capitais de provincia e por iso en Galicia non se teñen en conta os datos de cidades como Ferrol, Vigo ou Compostela. De feito, nesta última, os prezos incrementáronse.

Así, na actualidade, as galegas e os galegos teñen que destinar de media 29% do seu salario a facer fronte aos gastos do alugueiro.

Fonte | Nos Diario