Co sector turístico quentando motores tras un ano e medio de seca, as vivendas en alugueiro vacacional (VUT) baten unha marca histórica: máis de 12.000 rexistradas ao longo e ancho da Comunidade.

Dentro deste balance, a palma lévanlla catro municipios con máis tirón nos meses de verán, onde se atopan os alugueiros máis caros: Sanxenxo, a illa da Toxa, Baiona e Oleiros. No primeiro deles o número de vivendas en réxime vacacional é de 1.200 (máis que na propia capital) e un piso pode roldar os 1.300 euros á semana. Na Toxa, pola súa banda, están os alugueiros de praia máis prohibitivos de toda España -uns 2.800 euros a semana- pero, recalcan os expertos, isto non é representativo da realidade turística desta esquina atlántica.

Os primeiros en arrendar as súas casas durante a tempada de verán foron os veciños do propio municipio que aproveitan que teñen un inmoble baleiro nun pobo costeiro para ingresar un diñeiro extra. A eles sumáronse desde que as vivendas vacacionais deben rexistrarse -ano 2017- os propietarios chegados doutras localidades que tiñan unha segunda residencia na praia e que agora a ceden. A terceira pata desta triada de donos represéntana os investidores, os que viron o negocio e dedicáronse a comprar pisos para dedicar a este fin. 

A alta rendibilidade, a liberdade e o cobro asegurado son algúns dos factores que moveron moitas casas que estaban na bolsa de alugueiro convencional a unha turística da que, todo apunta, non se irán.