A pesar da pandemia, o mercado inmobiliario de Santiago de Compostela segue rexistrando cifras positivas: nos últimos meses confírmase un repunte nas vendas de aproximadamente o 15% e unha suba nos prezos de certas zonas da cidade.

Así, entre as zonas máis cotizadas de Compostela, ademais dos edificios do barrio histórico que se ofertan para uso turístico, atópanse as rúas tradicionalmente mellor valoradas da capital galega: Carreira do Conde, Xeneral Pardiñas e Montero Ríos. Porén, a necesidade de apostar por unha arquitectura de deseño, máis espaciosa e sustentable, provocou que as obras novas construídas en Cornes ou en Avenida da Liberdade -Santa Marta- se sitúen no podio da capital galega.

Estas son as zonas ou rúas máis valoradas pola cidade, nas que se pode observar o leve repunte dos prezos. Así, segundo os datos inmobiliarios que ofrece o portal Idealista, dende que comezou a pandemia e ata o verán de 2020 o prezo da vivenda na cidade non fixo máis que subir. O tope foi en xullo, cunha suba do 3,7 % en termos interanuais. Posteriormente, caiu entre setembro e decembro un máximo dun 1,7 %. Porén, co inicio do ano, mantense a tendencia xeral de 2020 cunha suba en termos de variación mensual do 0,2 % en xaneiro; e do 0,1 % interanual. Neste momento, o prezo medio do metro cadrado na cidade é de 1.888 €.

Fonte | El Correo Gallego