Os datos publicados recentemente polos rexistradores amosan un retroceso nas compravendas de vivendas e a sinatura de hipotecas en España. Segundo o avance de datos provisionais da Estatística Rexistral Inmobiliaria, as compravendas de vivenda alcanzaron as 53.478 operacións o pasado mes de xaneiro, cifra un 1,8% inferior á do mesmo mes de 2023. En canto ás compravendas totais, incluíndo todo tipo de fincas e non só vivenda, estas aumentaron en xaneiro, un 2,8% con respecto a xaneiro de 2023, alcanzando as 106.976 operacións, e poñendo fin a 13 meses consecutivos de descensos.

Ata oito comunidades rexistraron ascensos no volume de compravendas de vivenda, das cales destacan: Ceuta (+29,8%), Castela e León (+28,3%), Galicia (+22,1%), e Navarra e Castela-A Mancha (ambas cun avance do 19,7%). As comunidades que rexistraron un maior descenso en xaneiro foron A Rioxa (-12,8%) e Andalucía (-10,8%), xunto á cidade autónoma de Melilla (-23,3%).

No caso das hipotecas, en xaneiro constituíronse 40.420 sobre o total de fincas, un 14% menos que no mesmo mes de 2022, mentres que nas hipotecas sobre vivendas, estas totalizaron 31.076 en xaneiro, un retroceso interanual do 13,7%. Pese a estes descensos, os rexistradores afirman que a caída estase moderando con respecto a meses anteriores. 

Neste apartado tan só Galicia e Aragón presentaron aumentos interanuais en xaneiro, do 9,3% e do 2,9% respectivamente, mentres que nas outras 15 comunidades e as cidades autónomas de Ceuta e Melilla rexistráronse descensos, destacando Asturias (-31,9%), Cantabria (-21,4%) e Extremadura e Navarra (-21,3% en ambos casos).

Fonte.- Idealista