Segundo as cifras da Asociación de Empresas Inmobiliarias de Vigo (Asemi) e a Federación Galega de Empresas Inmobiliarias (Fegein), a cidade de Vigo pecha 2023 con 2.262 operacións de compravenda de vivenda, 264 menos que en 2022, por un importe aproximado de 339,3 millóns de euros, o que supón un terzo da provincia. Polo tanto, e á espera da entrada en vigor do Plan Xeral de Ordenación Municial (PXOM), e nun escenario de incremento dos tipos de interese, inflación e encarecemento da financiación, a cidade perde músculo na actividade inmobiliaria. 

O trimestre de máis actividade no sector inmobiliario foi o segundo, con 750 transaccións de vivendas novas e usadas, seguido do último, con 600. No primeiro e o terceiro, rexistráronse cifras similares, con 589 e 587 transaccións, respectivamente. En total, son un 10,5% menos en comparación co ano pasado.

Por primeira vez a maioría das operacións realizáronse sen axuda dun préstamo hipotecario. En concreto, foron máis da metade das operacións de compravenda de vivenda, un 52%. Segundo Benito Iglesias, presidente de Fegein e Asemi, “Isto reflicte a aposta de pequenos e medianos investidores polo mercado da vivenda en Vigo para destinala ao aluguer vacacional, principalmente, pola seguridade xurídica e a rendibilidade”. 

Fonte.- Faro de Vigo