O incremento do prezo medio do alugueiro na comunidade galega foi significativo en cidades como Lugo, cun aumento do 55% pasando dos 4,2 euros o metro cadrado aos 6,5; no caso de Santiago aproxímase ao 50% (de 5,7 euros a 8,5), un 48,3% na cidade da Coruña (de 6 a 8,9) e Ourense cun incremento do 45,5% de 4,4 euros o metro cadrado a 6,4. O prezo medio do metro cadrado na cidade de Vigo aumentou un 38,8% desde 2015, pasando dos 6,7 euros a 9,3, é dicir, un apartamento de 50 metros cadrados hai 8 anos custaría 335 euros, actualmente custa 465, é dicir, unha diferenza de 130 euros máis ao mes.

En comparación con outras grandes cidades de España a porcentaxe de subida foi superior aos de Madrid, Bilbao, Córdoba, Valladolid e Sevilla, urbes que posúen máis poboación que Vigo. De todos os xeitos, a cidade olívica é a sexta gran cidade do Estado na que menos se incrementou o prezo medio de alugueiro desde agosto de 2015, ano en que se rexistrou o algarismo máis baixo da serie histórica cun prezo de 6,7 euros o metro cadrado (ese prezo rexistrouse tamén en dous meses de 2016 e noutros dous de 2014).

Fonte.- Faro de Vigo