Segundo un estudo do goberno nipón que se publicou o pasado 30 de abril, hai un total de 9 millóns de vivendas desocupadas, o que corresponde ao 13,8% do total do país. A progresiva despoboamento das prefecturas periféricas inflúe na cifra: a taxa máis alta sitúase en Wakayama e Tokushima, cun 21,2%, seguidas por Yamanashi, cun 20,5%. Atribúese este elevado aumento de casas baleiras ao envellecemento da poboación, que alcanzou en 2023 un punto crítico, co número de nacementos en mínimos históricos. 

Acorde aos datos do Ministerio do Interior, arredor da metade das vivendas baleiras, unhas 4,76 millóns, están en alugueiro ou en venda, mentres que outras 380.000 están destinadas a uso vacacional ou ocasional. Pola súa banda, o número de casas abandonadas e non destinadas ao uso aumentou en 370.000 unidades con respecto ao anterior estudo, e alcanza na actualidade a cifra máis elevada xamais rexistrada, 3,85 millóns. Moitos destes edificios atópanse en condicións precarias, con xanelas mal iluminadas, paredes cubertas de vexetación e teitos inestables. A miúdo están expostos ao risco de derrube porque non recibiron mantemento desde hai moito tempo. 

O aumento continuo do número de casas deshabitadas rexístrase desde 1973 e a cifra duplicouse nos últimos 30 anos, en consonancia co descenso demográfico que se vive desde hai décadas en Xapón. Este aumento pode explicarse en gran parte por esta crise demográfica, pero non só en relación as defuncións, que alcanzaron o seu punto máis alto en 2023 con 1.590.500, senón tamén o traslado a residencias de maiores ou o fenómeno das "familias nucleares" son factores explicativos desta situación. 

A expectativa que se ten é un aumento das casas baleiras, debido ao continuo envellecemento da poboación da xeración do "baby boom". Para contrarrestar esta tendencia, o decembro pasado o goberno introduciu modificacións a unha lei segundo a cal os funcionarios municipais poden pedir aos propietarios de vivendas desocupadas que sigan regras específicas de xestión de edificios, e en caso contrario xa non poderán acceder aos beneficios fiscais.

Fonte.- asianews