O Banco de España urxe a incrementar o parque de vivenda de alugueiro social, que en España, sinalan, é "moi reducido" con apenas 300.000 pisos, situándose á cola de Europa. O organismo indica que é necesario para paliar o problema actual de acceso á vivenda, sobre todo no mercado do arrendamento, e, para levalo a cabo, é necesaria a colaboración entre as administracións públicas e o sector privado. Así o indicou o director do Departamento de Análise Macrofinanceiro e Política Monetaria do regulador financeiro, Roberto Blanco, durante a presentación do Informe Anual do Banco de España de 2023.

A institución tamén insiste en que a asignación de recursos que se dediquen a vivenda "deben estar dirixidos aos segmentos con menores ingresos e ás áreas tensionadas". Para fomentar a oferta e que haxa máis participantes neste mercado do alugueiro avoga por "reforzar a seguridade xurídica e reducir a incertidume regulatoria", para desta forma minimizar os riscos. 

O organismo encabezado por Pablo Hernández de Cos refírese no seu Informe Anual, no que dedica un apartado especial á vivenda, a algunhas das medidas que puxo en marcha o Goberno como o límite ás rendas do alugueiro. Sobre este punto, explica que a súa introdución "xustificouse polo seu efecto inmediato para reducir os problemas de sobreesforzo dos fogares vulnerables, pero o seu anuncio e aplicación sostida no tempo poden xerar novos problemas de accesibilidade á vivenda". 

Fonte.- El Correo Gallego