O mes de maio pechou cun aumento no prezo de alugueiro do 1,8%, ata alcanzar os 13,2 €/m2, o que supón un novo récord na serie histórica do prezo de alugueiro en España, segundo o último informe de prezos publicado por Idealista. De forma trimestral, o incremento corresponde ao 5%, mentres que de forma interanual, corresponde ao 13,4%. 

Ata 35 comunidades experimentaron subidas no prezo da vivenda en alugueiro neste mes, destacando Huesca onde as rendas subiron un 4,8%, seguido polas subidas de Xirona (4,5%), Xaén (4,2%), Huelva (3,8%) e As Palmas de Gran Canaria (3,1%). Polo contrario, Tarragona é a capital de provincia na que máis baixan as rendas durante o último mes (-2,2%), seguida de Zamora (-2,1%), Toledo (-2%), Melilla (-1,3%) e Segovia (-1,1%). O comportamento das rendas nos principais mercados do país foi totalmente alcista xa que aumentaron en Alacante (2,7%), Barcelona (2,4%), Palma (2,3%), Bilbao (2,3%), Valencia (1,7%), Madrid (1,3%), Sevilla (0,3%), Málaga (0,3%) e San Sebastián (0,1%).

Barcelona continúa sendo a capital cos prezos máis altos, alcanzando os 21,6 euros/m2, seguida por Madrid (19,4 euros/m2), San Sebastián (17,2 euros/m2), Palma (16,2 euros/m2), Bilbao e Málaga (14,2 euros/m2 en ambas as capitais). Doutra banda, Zamora (6,5 euros/m2), Cidade Real (6,6 euros/m2), e Ourense (7 euros/m2) son as capitais coa renda máis económica.

O prezo sobe ata en 38 provincias con respecto ao rexistrado no mes anterior, rexistrándose as maiores subidas en Baleares (7,6%), Huelva (7,4%), Soria (6,5%), Castellón (6,4%) e Xirona (6,1%). No lado contrario, as únicas provincias que experimentaron descensos nas rendas son Zamora (-2,1%), Teruel (-1,3%), Ávila (-1,1%) e Álava (-0,6%). Con esta subida, Baleares convértese na provincia máis cara (19,1 euros/m2), superando a Barcelona (18,5 euros/m2) e Madrid (17,6 euros/m2). Séguenlles Guipúscoa con 15,9 euros/m2 e Málaga con 14,8 euros/m2. Zamora (6 euros/m2) xunto a Xaén e Ciudad Real (6,1 euros/m2 en ambos os casos), pola contra, son as provincias máis económicas.

Fonte.- Idealista