Os alugueiros de tempada continúan aumentando a súa importancia no mercado inmobiliario, crecendo no primeiro trimestre do ano un 56% interanual, mentres que a oferta de alugueiro permanente descendeu no mesmo periodo un 15%. O peso deste tipo de alugueiros alcanza xa o 11% do mercado en España, chegando ata o 30% nalgunhas cidades. 

En Barcelona e San Sebastián, é o 30% do mercado inmobiliario o que se dedica ao alugueiro de tempada, mentres que en Cádiz alcanza o 21%. Séguenlles Badaxoz (18%), Madrid (15%), Valencia (13%) e Málaga (13%). Por debaixo desta cifra, pero igualando a media de España, atópanse os mercados de Palma, Santander e Bilbao (co 11% nos tres casos). Doutra banda, as zonas con menor tensión nesta modalidade, onde é practicamente inexistente, superando apenas o 0%, son Soria, Lugo, Ceuta, Ourense e Guadalaxara. Por último, co 1% atópanse as capitais de Cidade Real, Melilla, Teruel e Palencia.

As maiores subidas nos grandes mercados no volume de alugueiros de tempada sitúanse en Palma e Málaga, con incrementos do 79% no último ano, seguidas por San Sebastián (77%), Sevilla (74%), Valencia (62%), Madrid (56%) e Barcelona (53%). Os maiores incrementos de oferta deste tipo déronse en pequenos mercados onde este fenómeno era ata agora practicamente inexistente. Son os casos de Badaxoz (2.560%), Cáceres (800%), Huelva ou Lleida (650% en ambos os casos). Pola contra, en tan só catro capitais os alugueiros temporais reducíronse durante este ano: Lugo (onde desapareceron), Teruel (-67%), Palencia (-33%) e Ávila (-33%).

En contraposición ao aumento dos alugueiros vacacionais, a oferta de alugueiro tradicional está descendendo. Na media española fíxoo nun 15%, pero nalgúns grandes mercados o descenso é maior: Bilbao (-33%), Sevilla (-27%), Madrid (-24%), San Sebastián (-22%), Palma (-20%) e Barcelona (-15%). En Valencia e Málaga a oferta sí que aumentou, un 4% e un 2%, respectivamente. No resto de cidades, a maior caída deuse en Córdoba (-66%), Oviedo (-46%), Palencia e Ávila (-41% en ambos os casos), mentres que as maiores subidas producíronse en Cuenca (35%), Xirona (23%), Soria (17%), Almería (15%), Huelva (13%) e Teruel (11%).

Fonte.- Idealista