Os cambios producidos pola pandemia no mercado inmobiliario provocaron que as diferenzas entre as vivendas en venda máis caras e baratas nas principais cidades do sur de Europa se viran reducidas, segundo un estudo de Idealista utilizando a súa base de datos de España, Italia e Portugal. O índice Gini, utilizado para medir a dispersión das contornas económicas, é máis baixo na maioría dos grandes mercados do sur de Europa. Resulta necesario aclarar que o índice amosa a maior ou  menor homoxeneidade do mercado de compravenda de vivendas.

Así, é perceptible que o proceso de homoxeneización provocado pola pandemia fose igual nos 3 países. As capitais mantivéronse estables, xa que en Madrid e Roma o índice permanece igual que no mes de xaneiro de 2020, mentres que en Lisboa reduciuse en 1,5 puntos. Por cidades, Milán experimentou o maior descenso (-2,3 puntos), seguido por Bilbao (-1,5 puntos) e Málaga (-1,2 puntos). Con variacións inferiores a un punto do índice atópanse cidades como Oporto (-0,7 puntos), Barcelona (-0,6 puntos), Florencia (-0,4 puntos), ou Nápoles (-0,3 puntos). En Turín o índice non se moveu, mentres que Sevilla e Valencia son as únicas grandes cidades do sur de Europa na que a dispersión dos prezos creceu en 2020: 0,7 e 0,3 puntos, respectivamente.

Madrid é o mercado con prezos máis dispersos do sur de Europa, xa que as diferenzas entre as vivendas máis caras e baratas alcanzan un índice Gini do 83,3. Síguelle Oporto (79,9), Valencia (78,4), Milán (77,8), Turín (77,8), Barcelona (77,4), Málaga (77,2), Florencia (76,9) e Nápoles (76). No lado oposto atópase a cidade de Bilbao (72,4), o mercado máis uniforme do sur de Europa. A continuación sitúanse Roma (73,6) e Lisboa (74,6).

Fonte | Idealista