A rehabilitación de vivendas mantense como a protagonista do sector da construción na cidade de Pontevedra e a súa zona de influencia. Segundo os datos do primeiro trimestre de 2024 publicados polo Colexio Oficial de Arquitectura Técnica de Pontevedra, as obras de reforma suman 146 e representan o 67% do total de obras, sendo o resto, obra nova. Durante os tres primeiros meses de 2023, a rehabilitación representou o 65% dos expedientes (139), fronte ao 35% da obra nova (76). 

O presidente do Coatpo, Manuel Rañó, atribuíu esta alta representación ao feito de que as diferentes administracións públicas están apostando pola rehabilitación e o fan incentivando esta actividade a través de diferentes liñas de axuda. Ao seu xuízo, “esta política está a ser estratéxica para o noso sector e para a cidadanía, que pode afrontar obras que, doutro xeito, dificilmente poderían levar á práctica, mellorando a eficiencia enerxética dos edificios e o confort dos seus usuarios; sería desexable que estas axudas mantivésense, e mesmo se incrementasen, xa que a resposta está a ser abrumadoramente positiva”.

A cidade de Pontevedra e a súa zona de influencia rexistrou un total de 218 expedientes de dirección de obra no primeiro trimestre, un incremento do 1,4% respecto ao mesmo período de 2023, onde se rexistraron 215 expedientes. O colexio indica que a obra nova da cidade e o seu entorno pasou de 76 expedientes no primeiro trimestre do pasado exercicio a 72 neste, o que supón un descenso do 5,3%. En toda a provincia de Pontevedra tramitáronse durante o primeiro trimestre de 2024 un total de 129 vivendas unifamiliares e 13 edificios, que albergan 269 vivendas. Pola súa banda, no primeiro trimestre do pasado exercicio tramitáronse na provincia 158 vivendas unifamiliares, e nove edificios, cun total de 173 pisos. A tramitación de vivendas unifamiliares cae un 18,35%, e a de edificios, sobe un 44%. A media de vivendas por edificio creceu un 7%, segundo datos do Coatpo.

O presidente do Colexio declárase optimista, amosando que, salvo certas caídas puntuais, é un sector estable, e non se esperan imprevistos a curto prazo. Aínda así, destaca o prezo dos materiais, e a falta de man de obra como motivos que poden retardar ou aprazar proxectos ou incrementar os seus custos. 

Fonte.- MSN