A falta dunha estatística oficial, segundo os datos que manexan os portais Idealista e Fotocasa, os aumentos nos prezos foron constantes en 2023 e na maioría de rexións batiron os máximos históricos ante un desequilibro na oferta e a demanda que non deixa de crecer e que está a expulsar do mercado ás persoas con rentas máis baixas. O alugueiro pechou 2023 cun prezo preto dos 12 €/m2, e unha oferta en mínimos nos principais portais inmobiliarios, que dan como explicación a non fiabilidade das medidas regulatorias aplicadas. 

Segundo Idealista, o aumento nos prezos dos alugueiros foi o 10,1%, chegando ata os 12,1 €/m2 en decembro, un 2,7% máis que no trimestre anterior. Barcelona é a capital de provincia máis cara para alugar, 20,5€/m2, seguida de Madrid (17,9€/m2), San Sebastián (16,8€/m2) e Palma (15,4€/m2), mentres que as capitais máis baratas son Zamora (6,2€/m2), Cidade Real (6,6€/m2), Lugo (6,6€/m2) e Cáceres (6,7€/m2). En 50 capitais de provincia aumentaron os prezos en 2023, e máis da metade alcanzaron o punto máximo histórico en decembro. As comunidades nas que máis aumentaron os prezos foron Baleares (18,3%), Comunidade Valenciana (15,5%), Andalucía (13,1%), Madrid (11,9%) e Canarias (11,3%). 

Por outro lado, segundo Fotocasa, o crecemento nos prezos foi menor, do 5,7%, chegando en decembro aos 11,6€/m2. Madrid sería a comunidade máis cara, con 17,38€/m2, seguida por Baleares (16,9€/m2) e Cataluña (15,95€/m2). Os maiores incrementos situáronse en Madrid (49%), Baleares (45%), Cataluña (37%) e País Vasco (32%), todas por riba da media de crecemento de España neste período. 

A conclusión dos informes e datos de ambos portais, é que o alugueiro nunca estivo nunha situación cunha oferta tan reducida como agora, o que provoca que o mercado sexa cada vez menos dinámico, máis compacto e de máis difícil acceso. 

Fonte.- El Economista